काठमाडौं । काठमाडौं महानगरपालिकाको फोहोर बोकेका गाडी बञ्चरेडाँडाका स्थानीयवासी र राजनीतिक दलका प्रतिनिधिहरुले रोकेका छन् ।
स्थानीय र राजनीतिक दलका प्रतिनिधिहरुले सोमबार काठमाडाैंबाट फोहोर लिएर गएका गाडीहरुलाई बाटोमै रोकिदिएका हुन्।
केन्द्रीय सरकार र काठमाडौं महानगरले आफूहरुको माग कार्यान्वयन नगरेको भन्दै बञ्चरेडाँडावासीहरु पटकपटक आन्दोलित हुँदै आएका छन् । काठमाडौं महानगर प्रमुख बालेन साहले ल्याण्डफिल साइटमै पुगेर फोहोर फाल्न अवरोध नगर्न अनुरोध गर्दै स्थानीयका माग पूरा गर्ने प्रतिवद्धता व्यक्त गरेका थिए ।
महानगर र सरकारसँग पटकपटक सहमति भएपनि कार्यान्वयन नभएपछि बञ्चरेडाँडाका स्थानीयहरुले फोहोर विसर्जनमा अवरोध गर्दै आएका छन् । स्थानीयको आन्दोलनलाई राजनीतिक दल र जनप्रतिनिधिहरुले पनि समर्थन जनाएपछि बञ्चरेडाँडामा फोहोर विसर्जन गर्न थप चुनौती बनेको छ ।
आइतबार धादिङको धुनिबेशी नगरपालिका–१ का कांग्रेस सभापति पूर्णबहादुर तामाङ, माओवादी केद्रका अध्यक्ष विष्णु तामाङ र एकीकृत समाजवादीका अध्यक्ष भीषण धितालले संयुक्त विज्ञप्ति निकालेर बञ्चरेडाँडामा फोहोर फाल्न नदिन घोषणा गरेका थिए । आज दिउँसो सबै दलले संयुक्त वक्तव्य निकाल्ने तयारी भइरहेको छ ।
सोमबार बञ्चरेडाँडाका सयभन्दा बढी स्थानीय र राजनीतिक दलका प्रतिनिधिहरु सडकमा उत्रिएर अवरोध गरेपछि काठमाडौंबाट गएका कुनै पनि गाडीले फोहोर खसाल्न पाएका छैनन् । हिजो गएका २५ वडा गाडीले मात्र फोहोर खसालेका थिए।
अहिले राजनीतिक दलका प्रतिनिधि र स्थानीय पीडितका प्रतिनिधिहरुबीच वार्ता भैरहेको बताइएको छ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
