काठमाडौँ । नेपाली कांग्रेस संसदीय दल कार्यसमितिको बैठक आज बस्दैछ ।
संसद्मा पार्टीको भूमिकाबारे सोमबार पार्टीका शीर्ष नेताहरूसँग छलफल गरेका सभापति शेरबहादुर देउवाले मंगलबार संसदीय दलको बैठक बोलाएका हुन् । दलको बैठकअघि संसदीय दल कार्यसमितिको बैठक बस्दैछ ।
संसदीय दलका प्रमुख सचेतक रमेश लेखकका अनुसार विहान ७ः३० बजे संसदीय दल कार्यसमितिको बैठक बोलाइएको छ भने त्यसपछि ८ बजेबाट संसदीय दलको बैठक बस्नेछ । दुवै बैठक नयाँ बानेश्वरस्थित संघीय संसद् भवनको ल्होत्से हलमा हुनेछ ।
सहकारीको रकम अपचलनको आरोप लागेका उपप्रधानमन्त्री एवम् गृहमन्त्री रवि लामिछानेमाथि छानविन गर्न संसदीय समिति गठन गर्नुपर्ने माग गर्दै आएको कांग्रेसले गठन नभएसम्म संसद्मा गृहमन्त्रीलाई सम्बोधन गर्न नदिने नीति लिएको छ भने सरकारको छानविन समिति गठनमा ढिलाइ गरे संसद् अवरुद्ध गर्ने चेतावनी समेत दिएको छ ।
यसअघिको बैठकमा महामन्त्री विश्वप्रकाश शर्माले अर्को बैठकसम्म संसदीय छानविन समिति गठनका लागि भन्दै अल्टिमेटम दिएका थिए । प्रतिनिधिसभाको अर्को बैंठक मंगलबार बस्दैछ । त्यसअघि दलको बैठकमा छलफल गर्न लागेको हो ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
