add

पर्यटक लोभ्याउँदै गलकोटको 'मूर्तिकला'






ActPro Nepal

|

२ चैत, २०७९

|
443

ढोरपाटन । तल गलकोटमाथि घुम्टे लेक। बीचमा छ टेउवा। तीन वर्ष अगाडिसम्म गुमनाम रहेको टेउवा अहिले पर्यटक आकर्षणको केन्द्र बनेको छ।

पछिल्लो समय यहाँ दैनिक पर्यटकको चहलपहल बढिरहेको हो। २०७६ मा टेउवाको डाँडामा स्थापना गरिएका मूर्तिकलाले यस ठाउँको मुहार फेरिएको छ।

एक हजार नौँ सय ८० मिटरको उचाइमा रहेको टेउवामा अन्तर्राष्ट्रिय मूर्तिकारहरूले शिलामा कुँदेर बनाएका आकर्षकमूर्ति हेर्न दैनिक आन्तरिक पर्यटक यहाँ आउने गरेका छन।गलकोट नगरपालिका-५ मा पर्ने टेउवा एतिहासिक गलकोट दरबारको शिरमा पर्छ।

शान्त वातावरण, स्वच्छ हावापानी, यहाँ बनेको अनेक आकृतिका मूर्ति र यहाँबाट देखिने अनेकौँ दृश्यले आगन्तुकलाई लोभ्याउने गरेको छ। प्रेमिल जोडीसँगै पारिवारिक घुमघामको उपयुक्त स्थानका रूपमा टेउवा बन्दै गएको छ।

सहज यातायात र गलकोटदेखि नजिक हुँदा बाग्लुङ आउने पर्यटक यहाँ पुग्ने गरेका छन। टेउवामा पुग्ने आगन्तुकलाई घुम्टे लेकले घुम्टो उघारेर स्वागत गरिरहेको छ।

टेउवा पुग्ने पर्यटकले हटियार बजार, हरिचौरको गलकोट दरबार र नजिकै रहेको गाईघाट झरना ‘प्याकेज’ मै एकै पटक घुम्न सक्ने हुँदा आगन्तुको संख्या बढेको स्थानीयवासी बताउँछन्।

विशेष गरी चाडपर्व र बिदाको दिन टेउवामा आउनेको भीड लाग्ने गलकोट कला प्रतिस्ठानका अध्यक्ष पूर्णबहादुर रानाले जानकारी दिए। यहाँका स्थानीयवासीले पहिले यो ठाउँ यति धेरै चर्चित होला भन्ने नसोचेको भन्दै अहिले पर्यटकले भरिभराउ हुँदा दंग हुने गरेको बताए।

अध्यक्ष रानाले भने, ‘अहिले टेउवालाई थप व्यवस्थित बनाउँन थालेका छौँ, मूर्ति बनाएका ठाउँमा ढलान गर्ने र बार लगाउने काम भइरहेको छ, यसको व्यवस्थापनपछि थप पर्यटक आउने अपेक्षा गरेका छौँ, यति छोटो समयमा यति धेरै मान्छे घुम्न आउलान् भन्ने थिएन, दिनप्रति दिन आन्तरिक पर्यटकको आगमनमा वृद्धि भएको छ, महिना झण्डै दुई हजार पर्यटक यहाँ आउने गरेका छन।’

टेउवामा २०७६ फागुन ५ देखि २१ सम्म अन्तर्राष्ट्रियस्तरका मूर्तिकारको सम्मेलन गरी १० देशका १५ जना मूर्तिकारले १७ वटा मूर्ति तयार गरेका छन। राष्ट्रिय तथा अन्तर्राष्ट्रिय मूर्तिकारले बनाएका ती मूर्ति खुल्ला सङ्ग्रहालयमा राखिएका छन।

मूर्तिकारले ढुंगामा जल, जंगल, जमिन, पहाड, लगायतका आकृति तयार गरेका छन। यहाँ बनेका मूर्ति र यस ठाउँले तनावबाट मुक्त बनाउने बुटवलदेखि घुम्न आएका भएका विशाल रणपालले बताए।

विशालले भने, ‘यो ठाउँ र यहाँ बनेका मूर्तिकला साँच्चिकै मनमोहक छन्, पहाडै पहाडले घेरिएको यो ठाउँ, न यहाँ प्रदूषण छ, त्यो बजारको कोलाहालबाट यहाँ आउँदा निकै खुसी लाग्यो, बजारबाट यहासम्म आउने बाटो राम्रो बनाउन सके अझै सजिलो हुने थियो, तर पनि पहाडी क्षेत्रमा यत्तिको व्यवस्थापन धेरै राम्रो हो, फेसबुक, टिकटकमा यहाँको फोटो र भिडियो देखेका थियौँ, त्यही भएर साथी मिलेर गाडी लिएरै घुम्न आएका हौँ।’

पैदल यात्रामार्फत पर्यटकलाई टेवामा पुर्‍याउनका लागि गलकोट नगरपालिकाले कौलेनी-टेउवा पदमार्ग निर्माण गर्न थालेको छ। नगरपालिकाले चालु आर्थिक वर्षमा विनियोजन गरेको तीन लाखबाट करिब दुई सयमिटर पदमार्ग निर्माण गरेको वडा नं-५ का अध्यक्ष पवन हमालले जानकारी दिए।

टेउवामा पर्यटक आकर्षणका लागि यस वर्षदेखि पदमार्ग निर्माणको थालिनी गरेको उनको भनाइ छ। मूर्तिकला हेर्ने आगन्तुकको आगमनमा वृद्धि हुँदै गएपछि पर्यटन प्रवर्द्धनका लागि पदमार्ग अनिर्वाय रहेको उनले बताए।

हटियाबाजरदेखि गाडीमा आएर हरिचौरदेखि पदमार्ग हुँदै टेउवा पुग्न सकिने गरी काम भएको अध्यक्ष हमालको भनाइ छ। हरिचौरदेखि टेउवा जोड्ने सडक पनि स्तरोन्नति भइरहेको छ भने नाली निर्माण, सडक चौँडा गर्ने काम भइरहेको छ।

सडकलाई व्यवस्थित गरे बढीभन्दा बढी पर्यटक भित्र्याउन सकिने अपेक्षा लिएको छ। टेउवा प्रवेशद्वारका रूपमा रहेको हरिचौर बजारलाई थप व्यवस्थित गराउन थालेको हमालको भनाइ छ। प्रदेश सरकारले चालु आर्थिक वर्षमा विनियोजन गरेको १५ लाखले बजार क्षेत्र ढलान गर्ने काम भएको छ।

‘यस वर्षदेखि हरिचौर बजारलाई थप व्यवस्थित गर्न थालेका छौँ, यो बजार टेउवा मात्रै नभएर गाईघाट झरनाको प्रवेशद्वार पनि हो, त्यसले गर्दा यहाँको सौन्दर्यकरण गर्ने, बजार क्षेत्रमा फूलहरू लगाउने र सरसफाईलाई जोड दिएका छौँ’, अध्यक्ष हमालले भने, ‘पूर्वाधार निर्माणसँगै पर्यटन प्रवर्द्धनका लागि प्रचारप्रसारलाई पनि ध्यान दिएका छौँ।’

टेउवाबाट माछापच्छ्रे अन्नपूर्ण लगायतका दर्जनौँ हिमशृङ्ला नियाल्न सकिन्छ भने बाग्लुङ गुल्मीलगायतका ठाउँ पनि यहाँबाट देख्न सकिन्छ।

जिल्ला सदरमुकाम बाग्लुङ बजारदेखि ४५ किलोमिटरमा गलकोट पुग्न सकिन्छ भने गलकोटदेखि हरिचौर हुँदै करिब एक घण्टाको यात्रामा टेउवा पुग्न सकिन्छ। खोलानाला, पाखा पखेरा र गाउँले जनजीवन नियाल्दै पैदल यात्राबाट झण्डै दुई घण्टामा यहाँ पुग्न सकिन्छ।


एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई [email protected] मा पठाउनु होला। फेसबुकट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।


testbelow article3 ads  below article3 ads below article

प्रतिक्रिया

थप केही समाचार

Top

COPYRIGHT ©actpronepal.com 2024. ALL RIGHTS RESERVED.