काठमाडौं । काठमाडौं विश्वविद्यालयले चालु आर्थिक वर्ष २०८१/८२ का लागि सवा ४ अर्ब रुपैयाँ बढीको बजेट ल्याएको छ ।
बुधबार बालुवाटारमा विश्वविद्यालयको ९७औँ सभामा विश्वविद्यालयका रजिष्ट्रार डा. अच्युतप्रसाद वाग्लेद्धारा प्रस्तुत ४ अर्ब ३० करोड ९० लाख रुपैयाँको बजेट पारित भएको हो ।
त्यस्तै, सभाले आगामी २९औँ दीक्षान्त समारोहकाका लागि विभिन्न सङ्कायबाट दीक्षित हुने २ हजार ३१४ विद्यार्थीको ‘ग्रेसलिष्ट’ पारित गरेको छ ।
प्रधानमन्त्री केपी शर्मा ओलीले काठमाडौँ विश्वविद्यालय र धुलिखेल अस्पतालबीचमा भएको सहकार्यलाई आगामी ५ वर्षसम्म कायम राख्न निर्देशन दिएका छन् । ओलीले विश्वविद्यालय र अस्पतालबीच देखिएको असमझदारी र समस्या छलफल गरी समाधान गर्न निर्देशन दिएका हुन् ।
धुलिखेल अस्पतालले प्रदेश सरकारबाट प्रतिष्ठानको स्वीकृति लिन लागेको र विश्वविद्यालयले आफ्नै अस्पताल खोल्ने तयारी गरेको सन्दर्भमा दुई संस्थाबीच विवाद र अन्योल उत्पन्न भएको थियो ।
प्रधानमन्त्री ओलीले सिट क्षमताअनुसार विश्वविद्यलायमा विद्यार्थी भर्ना हुने अवस्था ल्याउन पनि सुझाव दिए ।
नेपाल सरकारको गत आर्थिक वर्षमा अनुमानभन्दा २४ प्रतिशतले राजस्व कम उठेको र खर्च बढेकाले चाहेर पनि सरकारले विश्वविद्यालयलाई थप अनुदान दिन नसक्ने प्रधानमन्त्री ओलीले स्पष्ट पारे ।
एक्ट प्रो नेपालमा प्रकाशित सामग्रीबारे कुनै गुनासो, सूचना तथा सुझाव भए हामीलाई info.actpronepal@gmail.com मा पठाउनु होला। फेसबुक र ट्वीटरमार्फत पनि हामीसँग जोडिन सकिनेछ । हाम्रो *युटुब च्यानल पनि हेर्नु होला।
