काठमाडौं । नेपाली कांग्रेसका प्रवक्ता विश्वप्रकाश शर्माले वीरगञ्जमा एक बालक रोगले भन्दा सरकारी अकर्मण्यताले मृत्यूवरण गरेको आरोप लगाएका छन् ।
वीरगञ्जमा कोरोना संक्रमणको आशंकामा उपचारमा लापरवाही गर्दा मंगलबार एक बालकको मृत्यु भएको थियो । झाडापखाला, ज्वरो र वान्ता आउने समस्या देखिएका बाराको बारागढी गाउँपालिका–२ का ९ वर्षीय सुशीलकुमार साहलाई कोरोना लागेको भन्दै अस्पतालहरुले उपचार गर्न आनाकानी गरेका थिए ।
आइतबार राति वीरगञ्जको नेशनल मेडिकल कलेजम लैजाँदा भर्ना लिन नमानेपछि उनलाई उनको आफन्तले वीरगञ्जको विभिन्न अस्पताल डुलाउँदै नारायणी अस्पताल लगेका थिए ।
नारायणीले चेकजाँच पछि बालकको अवस्था गम्भीर रहेकोले थप उपचारका लागि सुविधा सम्पन्न अस्पताल लैजान सल्लाह दिएसँगै परिवारले पर्साका प्रहरी उपरीक्षक गंगा पन्तलाई समस्याबारे जानकारी गराएका थिए । उनले नेशनल मेडिकल कलेजमा भर्ना गर्नका लागि पहल गरिदिपछि नेशनलले सोमबार विहान ९ बजे भर्ना गरेको थियो । तर उनको मंगलबार मृत्यु भएको हो ।
प्रहरीको दवावपछि नेशनल मेडिकल कलेजले भर्ना लिएपनि राम्रोसँग उपचार नगरेको मृतकका आफन्तले आरोप लगाएका छन् । बालकको मृत्यु भइसकेपछि उनको नारायणी अस्पतालको प्रयोगशालामा गरिएको पीसीआर परीक्षण रिपोर्ट नेगेटिभ आएको थियो ।
यही घटनालाई लक्षित गर्दै प्रवक्ता शर्माले बुधबार एक ट्वीट सन्देशमा लेखेका छन्, ‘सत्ताद्वन्द्व क्रममा मान्छेको चित्कारले हामीलाई थोरै पोल्नु पर्दैन आदरणीय प्रधानमन्त्री र प्रचण्ड ?’
उनले अगाडि लेखेका छन्, ‘नौ बर्षका बालकको मृत्युपछि आएको कोरोना नेगेटिभ रिपोर्ट फ्रेममा सजाएर सिंहदरबारमा राख्ने कि धुम्बाराही ? माफ गर बाबु, तिम्रो मृत्यु झाडापखालाले होइन हाम्रो अकर्मण्यताले भएको हो ।’
प्रतिक्रिया