काठमाडौं । नेपाली कांग्रेसले १४औँ महाधिवेशनको लागि आज बिहीबार लोगो सार्वजनिक गर्ने भएको छ ।

महाधिवेशनको लागि आज दिउँसो ४ बजे प्रधानमन्त्री समेत रहेका सभापति शेरबहादुर देउवाले लोगो सार्वजनिक गर्ने कार्यक्रम रहेको कांग्रेस प्रचार विभागले जनाएको छ । 

१४औं महाधिवेशन केन्द्रीय प्रचार प्रसार समितिले महाधिवेशनका सन्दर्भमा आज आयोजना गरेको पत्रकार भेटघाट कार्यक्रममा सो जानकारी गराइएको हो । 

महाधिवेशनका लागि २९ वटा मतपत्रमा मतदान गर्नुपर्ने, भृकुटीमण्डप, राष्ट्रियसभा गृह र पुलिस क्लबमा मतदान केन्द्र बनाइने र एक जनालाई मतदान गर्न कम्तीमा एक घण्टा लाग्ने कांग्रेसको जनाएको छ । 

आजदेखि कांग्रेसको प्रदेश अधिवेशन सुरू हुँदैछ । सभापति देउवाले सातै प्रदेशको प्रदेश अधिवेशन भर्चुअल माध्यमबाट दिउँसो दुई बजे एकैपटक उद्घाटन गर्ने भएका छन् । 

कांग्रेसको १४औँ महाधिवेशन यही मङ्सिर २४ देखि २६ गतेसम्म काठमाडौँमा हुँदैछ ।

कांग्रेसको देशभर ८ लाख ४० हजार १०६ जना क्रियाशिल सदस्य रहेका छन् । जसमा, प्रदेश १ मा एक लाख ७४ हजार ८१३, प्रदेश २ मा एक लाख ९९९, बागमती प्रदेशमा एक लाख ८६ हजार ३३५, गण्डकी प्रदेशमा एक लाख १८ हजार १५४ क्रियाशिल सदस्य रहेका छन् । यसै गरी लुम्बिनी प्रदेशमा एक लाख ३१ हजार ११७, कर्णालीमा ५३ हजार ५९६ र सुदूरपश्चिममा ७५ हजार १०१ जना क्रियाशिल सदस्य रहेका छन् ।