मकवानपुर। जिल्ला प्रहरी कार्यालय मकवानपुरको टोलीले ३४ किलो लागुऔषध गाँजासहित एक जनालाई पक्राउ गरेको छ।

पक्राउ पर्नेमा पर्सा जिल्ला बिन्दावासिनी गापा ३ बस्ने २९ बर्षीय रबिन्द्र उपाध्याय रहेका छन्। पक्राउ परेका उपाध्यायलाई सुमोसहित पक्राउ गरेको जिल्लाका प्रहरी सहायक निरीक्षक प्रभु राउतले जानकारी दिए।

बुधबार १२:१५ बजेको समयमा पालुङबाट भैसेतर्फ आउदैं गरेको ना १ ज ४७३३ नंको सुमो गाडीमा लागूऔषध गाँजा लुकाई छिपाई ल्याउँदै गरेको छ भन्ने बिशेष सुचनाको आधारमा प्रहरी चौकी भैंसेबाट असई राउतको नेतृत्वमा खटिएको प्रहरीको टोलीले उनलाई पक्राउ गरेको हो।

प्रहरीको टोलीले सडकमा चेकजांच गर्न रोक्न खोज्दा नरोकेको र पछि फलोअप गर्दै जाँदा भिमफेदी १ सुन्दरीमाईस्थित राप्तीखोलाको बगरमा फेला पारेर पक्राउ गरेको असई राउतले बताए।

उक्त घटनाको बिषयमा जिल्ला अदालत मकवानपुरबाट लागुऔषध मुद्धामा म्याद अनुमती लिई आवश्यक अनुसन्धान भईरहेको प्रहरीले जनाएको छ।