काठमाडौं । प्रधानमन्त्री केपी शर्मा ओलीको आगामी चीन भ्रमणका लागि ८७ सदस्यीय टोली सहभागी हुने भएको छ। बिहीबार बसेको मन्त्रिपरिषद्को बैठकले मंसिर १७ देखि २० गतेसम्म हुने भ्रमणलाई स्वीकृति दिएको हो।

संस्कृति, पर्यटन तथा नागरिक उड्डयनमन्त्री बद्रिप्रसाद पाण्डेका अनुसार भ्रमण टोलीमा निजी क्षेत्र, सांसद, परराष्ट्रमन्त्री, र विज्ञहरूको उपस्थिति रहनेछ। न्यूनतम सदस्यतामै भ्रमण टोली गठन गरिएको दाबी गर्दै उनले निजी क्षेत्रको उल्लेखनीय सहभागिता रहेको जानकारी दिए।

भ्रमणका प्राथमिक एजेन्डाबारे छलफल जारी रहेको मन्त्री पाण्डेले बताए। ‘प्रधानमन्त्रीज्यूको नेतृत्वमा चीनमा हुन लागेको भ्रमणका एजेन्डाहरू अन्तिम चरणमा छन्। निजी क्षेत्रको सहभागिताले दुई देशबीचको आर्थिक सहकार्यलाई थप बलियो बनाउने विश्वास लिएको छ,’ उनले भने।

प्रधानमन्त्रीको यो भ्रमण दुई देशबीचको कूटनीतिक सम्बन्धलाई प्रगाढ बनाउने उद्देश्यले आयोजना गरिएको हो। टोलीमा ८७ सदस्यको सहभागितालाई लिएर केही पक्षले प्रश्न उठाए पनि सरकारले यो भ्रमणलाई न्यूनतम आवश्यकतामा सीमित राखिएको बताएको छ।

भ्रमणले द्विपक्षीय आर्थिक, व्यापारिक र सांस्कृतिक सहकार्यलाई सुदृढ बनाउने अपेक्षा गरिएको छ।