योगदिवसको उपलक्ष्यमा शुभकामना 

(अनुष्टुप्)

यो-ग नै असली सत्ता पत्ता लगाउने कडी

ग-रिष्ठ रोगको लागि योग नै ओखती जडी ।।१

दि-नानुदिन अभ्यास गरेमा रोग टर्दछन्

व-रिष्ठ सन्त अभ्यासी त्यसैले योग गर्दछन् ।।२

स-दा अभ्यास गर्ने यो राखौँ बानी सबै जना

को-ही सार छँदै छैन धर्तीमा योगको विना ।।३

उ-मेरैमा गरे मात्रै दिव्य उर्जा दिलाउने

प-छि गर्छु भनी बस्दा वार्धक्यले सताउने ।।४

लक्ष्य हो सबको आत्मा पहिचान कसै गरी

मा-द उन्माद त्यागेर गरौँ योग सधैँभरि ।।५

शु-भ कर्मसँगै हामी प्रेमले साधना गरौँ

भ-ण्डार दु:खका सारा नासिन्छन् के बढी भनूँ ।।६

का-या क्षय हुँदै जान्छ अभ्यास नमिलाउँदा

म-रेतुल्य बनाएर उल्टै रोग बढाउँदा ।।७

ना-ता विश्वविधातामा जुडाऔँ साधना गरी

छ-र्दै सुवासना नित्य गरौँ योग सधैँभरि।।

स्रष्टा- दिनेश पाण्डे