काठमाडौं । नेकपा ()एमाले)का नेता माधवकुमार नेपालले पार्टीका अध्यक्ष तथा निवर्तमान प्रधानमन्त्री केपी शर्मा ओलीलाई फेरि प्रधानमन्त्री बन्ने प्रयास नगर्न चेतावनी दिएका छन् ।

काठमाडौंमा शनिबार अखिल फोर्सको बृहत भेलालाई सम्बोधन गर्दै नेपालले निवर्तमान प्रधानमन्त्री केपी शर्मा ओलीलाई फेरि प्रधानमन्त्री बन्ने प्रयास नगर्न सुझाव दिएका हुन ।  

“यो प्रतिनिधिसभा विघटन गर्ने दुस्साहस अब कसैले पनि नगरोस् । फेरि फर्केर प्रधानमन्त्री बन्छु कि भनेर जालझेल र षडयन्त्र कसैले नगरोस् । अब जे हुनेछ, पारदर्शी ढंगले हुनेछ,” उनले भने, “संविधानको संरक्षण भएको छ । संविधानको सही व्याख्या भएको छ । सर्वोच्च अदालतको फैसलाप्रति हामी सम्मान गर्न चाहन्छौँ ।”

संविधान जोगाएर नयाँ सरकार बनाएको उल्लेख गर्दै उनले सरकारलाई राम्रो काम गरेर देखाउन पनि आग्रह गरे । सही विचार आत्मसात् गरेर अघि बढ्न पार्टी कार्यकर्तालाई निर्देशनसमेत दिए ।

अर्को प्रशंगमा उनले अब नेपालमा राजतन्त्र फर्कने वा फर्काउने दिवास्वप्त नदेख्न चेतावनी दिए । 

कार्यक्रममा नेतृ रामकुमारी झाँक्रीले अध्यक्ष ओलीले पद त्याग नगरेसम्म एमाले एकता हुन नसक्ने बताइन । भेला अघि अखिल फोर्सले काठमाडौंमा बृहत मोटरसाइकल र्‍याली निकालेको थियो ।