नयाँ दिल्ली । छिमेकी राष्ट्र भारतको दिल्लीस्थित अस्पतालहरुमा अक्सिजनको चरम अभाव भएको छ । दिल्लीस्थित जयपुर गोल्डेन अस्पतालमा अक्सिजनको अभावकै कारण २५ जना कोरोना संक्रमितहरुको मृत्यु भएको छ ।

त्यस्तै, कोरोना संक्रमितहरु तीब्र रुपमा बढिरहेको अवस्थामा दिल्लीस्थित महाराजा अग्रसेन अस्पताललगायतमा अक्सिजनको चरम अभाव भएको बताइएको छ ।

महाराजा अस्पतालमा ३०६ जना गम्भीर विरामी

महाराजा अग्रसेन अस्पतालले अक्सिजनको तत्काल सप्लाई गर्नका लागि दिल्ली हाई कोर्टमा उजुरीसमेत दर्ता गरिसकेको छ, जहाँ सुनुवाईको क्रममा अस्पतालले ३०६ जना कोरोनाका विरामीसहित दुई वटा अस्पताल सञ्चालन गरिरहेको जनाएको छ ।

अस्पतालले भनेको छ, ‘हिजो राति नै हामीसँग भएको अक्सिजन करिब सकिएको थियो । आज दिउँसोसम्ममा हामीसँग भएको अक्सिजन सकिदैछ । त्यसैले हामीले गम्भीर विरामीहरुलाई समेत डिस्चार्ज गरिरहेका छौं ।’

अस्पतालले थप भनेको छ, ‘हामीलाई आफ्नो विरामीहरुका लागि अक्सिजनको आवश्यक छ । क्रिटिकल युनिटमा १०६ जना विरामीहरु रहेका छन् । यदि अक्सिजनको आफूर्ति भएन भने गम्भीर विरामीहरुको पनि डिस्चार्ज गर्नुपर्ने हुन्छ ।’

अक्सिजनको कमीका कारण २५ विरामीको मृत्यु

दिल्ली हाईकोर्टका अनुसार अक्सिजन अभावकै कारण गएराति जयपुर गोल्डेन अस्पतालमा उपचाररत २५ विरामीहरुको मृत्यु भएको छ । अस्पतालका मेडिकल निर्देशक डा. डीके बलुजाले आफूहरुसँग भएको अक्सिजनले करिब आधा घण्टा मात्रै थेग्नने बताएका छन् ।

उनका अनुसार जयपुर गोल्डेन अस्पताललाई ३,६०० मेट्रिक टन अक्सिजनको आवश्यक रहेको छ । तर, सो अस्पताललाई १,५०० लिटर मात्रै प्राप्त भएको मेडिकल निर्देशक डा. बलुजाले बताए ।c